પ્રિયતમ પ્રત્યેના પ્રેમનું પ્રમાણ માપવાની વિજ્ઞાન શોધ કરે ત્યાં સુધી સુરેશ દલાલે જણાવેલ આ માપદંડ મને માન્ય છે. આપને?!!
પૂછતી નહીં કેટલો પાગલ… કેટલો પાગલ…
આભમાં જોને કેટલાં વાદળ…
એટલો પાગલ…
ઝાડનું નાનું ગામ વસાવ્યું ને ફૂલને
તારું નામ દીધું છે.
ભમરા તને ગુંજયા કરે: ગુંજવાનું મેં કામ દીધું છે.
જળને તારું નામ દઈ ઢંઢોળી દેતો.
ખોવાઈ ગયેલા નામને મારા ખોળી લેતો.
નદી તારા નામની વહે: એ જ નદીનું જળ પીધું છે.
આપણા પ્રેમની, સુખની દુ:ખની વાત કરું છું
શબ્દો આગળ.
પૂછતી નહીં કેટલો પાગલ… કેટલો પાગલ…
પ્હાડની ઉપર સૂરજ ઊગ્યો: રાતના ઊગ્યા તારા.
દિવસ અને રાત તો તારા નામના છે વણજારા.
ધરતીમાંથી નામનાં તારા તરણાં ફૂટે.
ઝરણાં તારા નામને ઝીણા લયમાં ઘૂંટે.
સાગર, ખડક, પવન, સડક, ઝૂંપડી, મકાન…
સૌને તારું નામ કીધું છે.
નામ તો તારું ગીતને માટે
સાવ કુંવારો કોરો કાગળ…
પૂછતી નહીં કેટલો પાગલ… કેટલો પાગલ…
(આજ ગીત રૂપકુમાર રાઠોડના સ્વરાંકન અને પાર્થિવ ગોહિલના સ્વરમાં આ લિન્કમાં માણો!
http://www.youtube.com/watch?v=_-hUuiYHGeo )
ટિપ્પણીઓ નથી:
ટિપ્પણી પોસ્ટ કરો