''તુમ સે બઢકર દુનિયા મેં, ન દેખા કોઈ ઓર ઝુબાં પર, આજ દિલ કી બાત આ ગઈ.....''
કોઈ મ્યુઝિક ચેનલ પર, આજના યંગસ્ટર્સ માટે 'જૂના' કહી શકાય એવા ફિલ્મી ગીતોનો કાર્યક્રમ ચાલી રહ્યો હતો. ફિલ્મ 'કામચોર'નું આ પ્રખ્યાત અને અત્યંત કર્ણપ્રિય એવું ગીત શરૂ થયું. મારું મન શરૂઆતમાં રેકર્ડ પર વાગતા સાયગલ જેવા અવાજ પર સ્થિર થયું. અને એ જ સમયે મારા ટીનેજર દીકરાએ પૂછ્યું,
''મોમ, આ કોણ છે?''
''રાકેશ રોશન, હ્યતિક રોશનના પાપા!''
''ઓહ, એમને માથે આટલા બધા વાળ હતા?!!!''
રાકેશ રોશનને આજની પેઢી આ જ રીતે ઓળખે એમાં કંઈ નવાઈ નથી. જો કે, મારા મિત્રો રાકેશ રોશનને પ્રખ્યાત સંગીતકાર રોશનના સુપુત્ર તરીકે ઓળખે એવી શક્યતા વધુ છે! આજના આ સફળ નિર્માતા-દિગ્દર્શક પર યુવાનીમાં અભિનયનું ભૂત સવાર હતું અને અભિનેતા તરીકે સામાન્ય કહી શકાય એવી સફળતા પણ મેળવી. પરંતુ નિર્માતા તરીકે જોઈએ એવી સફળતા મેળવી શક્યા ન્હોતા. 'કામચોર' (૧૯૮૨) ની સફળતાએ એમની નિષ્ફળતાના દરિયામાં માથાબૂડ ડૂબેલી કારકિર્દીને ઓક્સિજન પૂરવાનું કામ કરેલુ. પણ એમાં રાકેશ રોશનના અભિનય કરતા એમના જ ભાઈ રાજેશ રોશનના સંગીતનો સિંહફાળો હતો, એમ કહેવું અસ્થાને નથી જ.
ઉપર જેનો ઉલ્લેખ કર્યો એ ગીત ફિલ્મમાં બે અવાજમાં સાંભળવા મળે છે. એક તો વધુ જાણીતું વર્ઝન કિશોર કુમાર-અલકા યાગ્નિકના અવાજમાં અને બીજું મહાન ગાયક કે. એલ. સાયગલના અવાજની પ્રતિકૃતિ ગણાતા ગાયક સી.એચ.આત્માના નાના ભાઇ ચંદ્રુ આત્માના અવાજમાં. તેઓ ‘સાયગલ સંધ્યા’ નામે સાયગલનાં ગીતોના કાર્યક્રમો આપીને જાણીતા બન્યા હતા. તેમણે ફિલ્મોમાં ફક્ત ચાર જ ગીત ગાયાં.
૧. મેરી ઝિંદગીકી કશ્તી- ફિલ્મ: ભૂમિકા(૧૯૭૭), સંગીતઃ વનરાજ ભાટિયા
૨. હમ પાપી તુમ - ફિલ્મ: સાહિબબહાદુર(૧૯૭૭) સહગાયકોઃ મહેન્દ્ર કપુર-અંબરકુમાર-ચંદ્રાણી મુખર્જી-દિલરાજ કૌર- સંગીતઃ મદનમોહન
૩. સાંવરિયા તોરી પ્રીત- ફિલ્મ: પ્રેમબંધન(૧૯૭૮), સંગીત - લક્ષ્મીકાંત-પ્યારેલાલ
૪. તુમસે બઢકર દુનિયામેં- ફિલ્મ: કામચોર(૧૯૮૨), સંગીત - રાજેશ રોશન
ચંદ્રુ આત્માના વિશિષ્ટ સ્વરમાં આ અવિસ્મરણીય પ્રણય ગીત અહીં સાંભળો..
ટિપ્પણીઓ નથી:
ટિપ્પણી પોસ્ટ કરો